(( إلى التي مزّقت بأظافرهِمّتِها أستارالموج العاتي وتحدّْتْ حجب المتاهات بعزم فولاذي. فـلترعاكِ يا ابنتي عناية الرّحمان ما بقي في روحك نسمة من حياة..!! ))
قـُرَّةْ الْعِينْ يَا عَزّْ النَّاسْ
مَا بِينْ اخْوَاتَكْ فَ الْعَشْرَه
سْمَاحَه وُنِيَّه وُظـْرَافَه
شَانْ وُهَمَّه وُلْطَافَه
عْلِيكْ تْبَانْ فْ أوَّلْ نَظـْرَه
زَهْرَة لَعْيَانْ يَارَاحْةْ الـُرّوحْ
بَ الّلِي بِيَا مَا قـْدَرْتْ نْبُوحْ
يَا نَاسْ فِيدُونِي بَالـْمَرَّه..!!
***
مْشَاتْ اعْوَامْ وُجَاتْ اعْوَامْ
وُمَنْ بَعْدْ الَّلمَّه وُالْعَشْرَه
هَبَّاتْ عْلِيكْ رْيَاحْ الشّـُوقْ
لَلْغـُرْبَه وْأرْضْ الْأَحْلَامْ
عْلَى عَوْدَكْ هَازَّه لَحْمَالْ
وُعْلَى رَاسَكْ تَاجْ الْأمَلْ
فْ لَهْنَا وُالْعَزّْ وُرَاحْة ْالْبَالْ
نْطَقـْتِ كَلْمَاتْ فِيهَا دَمْعَاتْ :
” اُمِّي وْبُويَا غِيرْعَذْرُونِي
وُدْمُوعْ فـْرَاقـْكُمْ فَ عْيُونِي
وُفَ الشَّدَّه لَا تْلـُومُونِي
دْعِيوْ اللهْ يِقِيلْ الْعَثـْرَاتْ
فَ الْحَيَاة ْقـَبْلْ الْمَمَاتْ ”
***
كَانْ صَبْرَكْ غَايَه فَ الشَّدَّه
وُالشَّدَّه تْهَيَّجْ لَحْزَانْ
لَكِنْ الْبَسْمَه فَ عْيُونَكْ
مَا تَخْطَاهَا نَظـْرَة ْلَعْيَانْ
كـُنْتِ قدْوَه لَقـْرَانَكْ
خِيرْ وُفَلَاحْ مَنْ إيَّامْ زْمَانْ
كـُنْتِ فَ رْقَادَكْ وُفـْيَاقـَكْ
رَاضْيَه بَالْقَسْمَه وُالّلِي كَانْ
وُنْتِ الْيُومَا يَاعَزّْالنّاسْ
فَ حْمَايْة َالْخَالَقْ الرَّحْمَانْ
***
فْ يُومْ رْحِيلَكْ بَانْ الْبُرْهَانْ
وُشْحَالْ بِنَا حَارَتْ لَدْهَانْ
مَا بِينْ الْبَسْمَه وُالدَّمْعَاتْ
فُرْحَه بَ احْوَالَكْ فَ الجَّايَّاتْ
وُاحْزَانْ فـْرَاقَكْ بَ الْكَمْشَاتْ
گَالـُو نَاسْ إيَّامْ زْمَانْ
رَاهْ لَفْرَاقْ عـُودُه مَذبَالْ
بَعْدْ مَا هـُوَ كَانْ اخْضَرْ
وُعْطَا شَلَّا غَـلَّه وَتْمَـرْ
***
يَاكْ صَادَقْ هـُوَ مَنْ قَالْ
جَمْرَةْ لَفْرَاقْ گَادْيَه تَحْرَقْ
وُدَمْعْ الْعِينْ دِيمَا سِيَّالْ
وَاشْ يِفِيدْ الّلِي مَلْهُوفْ ؟
بْعَزّْ بْلَادُه وَاوْطَانُه
وُمَا بِينْ احْبَابُه وُقـْرَانُه
إيلَا عْلِيهْ ضْيَاقْ الْحَالْ
وُدَارْتْ عْلِيهْ الدْوَايِـرْ
فَ دْرُوبْ الْمَحْنَه وَالتِّيهَانْ
هَايِمْ وَحْدُه بِينْ الطـّـُرْقَانْ
يَائَسْ مَهْمُومْ وُحَايِرْ
وُذْبَالْ رْجَاهْ بَعْدْ الْمُحَالْ..؟
***
بَنْتْ الْأُصُولْ يَا عَزْ النَّاسْ
هَاكْذَا عْلِيكْ حَكْمَاتْ اقـْدَارْ
بَعْدْ الْهَجْرَانْ مَا بْقَاشْ خْيَارْ
تْمَنِّيتْ اللهْ يِكَمَّلْ رْجَاكْ
فْ أرْضْ الْخِيرْ تْصِيبْ هْنَاكْ
وُتْزُولْ الْغَمَّه وَالْوَسْوَاسْ
تَهْنَا رُوحَكْ وُيَتْحَدْ الْبَاسْ
صالـح اهـضير / المغرب
