(زجل)
- مراية ليام ميزان ذهب
- توزن الفضة والويز
- تنفض لغبار وتوريك لعجب
- وتفضح كل من حسبتو عزيز
- تعري ل الذيب نكَابو
- وما يلقى حيلة باش ينكر
- يبانو ليه لمخالب ونيابو
- والسم من ريقو يقطر
- مراية ليام صادقة ف لحكام
- تعرف الثعلب وتوريك غارو
- تشاور ليك على لِّي كان سباب فَ السقام
- وتكَول ليك ها المعدن وشحال ف عيارو
- مراية ليام كيف ثوب الكتان
- تصفي لحليب من الشعرات
- ما تخدعها ضحكة ولا وجه فتان
- وتحسب ليك شحال درتي من عثرات
- ما ليها مثيل ف الصفاوة
- تعطيك لقفل ومفتاحو
- ما تخليك تايه فَ وهام الخاوة
- وتوريك الخاين فين داس سلاحو
- طيري بيا يا مراية ليام
- نحلقو ساوة على بساط الريح
- ديري لَ الغذار وشام
- وما باقي لو يخدع ب التسبيح
- يا مراية شحال أنا ليك مدين
- شعلتي القنديل ف الديجور
- بان لي ما صافي ف الحين
- وكشفتي لمدركَ و المستور
- يا مراية رسمي لي لوحة
- نقرا فيها شلا كلام
- عطيتيني صورة مفتوحة
- وما نبقى عايش ف لوهام
- لا تغريني ف راحل مشى ونسيتو
- وعزيني فَ لي مات فَ عياني
- طويت صفحاتو وتحت التراب دفنتو
- وغذرو شحال عياني
- هاذي حكاية واحد مغفل
- ذاق من القطران وحسبو عسل
- بلا ما يشاور زرب وما تمهل
- وحكايتو حكاية وحديث ومغزل
***
إبراهيم ورطاسي، بركان، المغرب.
